ایک تازہ غزل : مل بیٹھ کے وہ ہنسنا ہنسانا بدل گیا

مل بیٹھ کے وہ ہنسنا ہنسانا بدل گیا
منظر محبتوں کا پرانا بدل گیا

گاؤں ہمارا شہر کی رونق نگل گئی
سب کچھ بدل گیا جو زمانہ بدل گیا

کردار کچھ نئے جو کہانی میں آ گئے
پھر یوں ہوا کہ سارا فسانہ بدل گیا

بچے سکھا رہے ہیں بڑوں کو نئے رواج
رشتے بدل گئے ہیں گھرانا بدل گیا

اب ہم ستائے جاتے ہیں الفت کے نام پر
ہم سوچتے تھے اس کا نشانہ بدل گیا

روٹھا ہے جب سے ایک پرانا ہمارا یار
موسم ہمارے دل کا سہانا بدل گیا

ویرانیوں کا راج ہے ہر سو یہاں وہاں
دل کا مکین جب سے ٹھکانا بدل گیا

سعید سعدی
12-12-2029

 

بہت خوبصورت

 

پسندیدگی کا بہت شکریہ ارشد بھائی۔۔۔