ترا پیار دل میں بسایا ہوا ہے----برائے اصلاح

شکیل احمد خان
سعید احمد سعدی
-----------
ترا پیار دل میں بسایا ہوا ہے
کہ محبوب تجھ کو بنایا ہوا ہے
-------
ہے انکار کیوں اب محبّت سے میری
یہ پودا تمہیں نے لگایا ہوا ہے
----------
مری کیا خطا تھی ذرا یہ بتا دو
جو منہ آج تم نے پھلایا ہوا ہے
--------------
مری چاہتوں کے جو گاتا تھا نغمے
وہی آج مجھ سے پرایا ہوا ہے
------
تری اصل صورت چھپی جا رہی ہے
یہ غازہ جو اتنا جمایا ہوا ہے
------------
مرے تم رقیبوں سے ملتے ہو اب تک
یہ کیا تم نے چکر چلایا ہوا ہے
--------
جو بنتے ہو ارشد حقیقت نہیں ہے
زمانے کو پیچھے لگایا ہوا ہے
-------

 

۔۔۔۔۔۔۔۔یہ پودا تمھارا لگایا ہوا ہے

 

۔۔۔۔۔۔۔۔جو منہ تم نے مجھ سے پھلایا ہوا ہے

 

۔۔۔۔۔ غازہ عورتوں کے ہار سنگھار کی چیز ہے۔شعر ونثر اور گفتگو
میں میرا خیال ہے غازہ ملنا ۔۔۔۔۔۔۔۔۔۔۔۔ہوتا ہے جیسے اُبٹن
ملی جاتی ہے اور جیسے مسّی کی دھڑی جمائی جاتی ہےاور جیسے ۔۔۔۔
سرمہ لگایا جاتا ہے ۔۔۔۔۔۔۔۔۔۔۔۔۔۔۔۔۔۔۔۔۔ایسے ہی
غازہ ملا جاتا ہے ، لگایا جاتا ہے ،غازہ بندی اور غازہ پیرائی بھی دُرست
ہے اور تو اور غازہ دیا بھی جاتا ہے جیسے اُس نے اپنے رخساروں
پر کیا خوب غازہ دیا ہے۔۔۔۔۔۔۔۔پھر غازہ چھڑایا بھی جاتاہے
یعنی چہرے سے وہ سفوف یا پاؤڈر جو آرائش کے لیے ملا تھا ، ہٹادینا۔

 

تری اصل صورت چھپی جارہی ہے
یہ۔ غازہ ۔جو ۔اتنا ۔لگایا۔ ہوا۔ ہے

 

جب تیرا پیار دل میں بس گیا ہے یا بسالیا ہے تو دوسرے مصرعے میں کہنا کہ تو میرا محبوب
ہے ۔۔۔۔۔۔۔۔۔۔۔۔۔۔یہ ایک ہی بات کا دہرانا ہواجبکہ بات کو آگے بڑھانا ہے اور
اسی سیاق وسباق میں بڑھانا ہے۔۔۔۔۔۔۔۔۔۔۔۔۔۔۔
1۔۔۔۔۔۔۔دل میں تیرا پیار ہے
2۔۔۔۔۔۔نظر میں تیرا چہرہ ہے
۔۔۔۔۔۔۔۔۔۔۔۔۔۔۔تو میرا خیال ہے یہ دوباتیں ہوگئیں ، نثر کے دوجملے بن گئے یا
شعرکے دومصرعے۔۔۔۔۔۔ایک میں دل کا حال ایک میں فکر و نظر کی صورتِ حال:
۔۔۔۔تیرا پیار دل میں بسایا ہوا ہے

نگاہوں میں تو ہی سمایا ہوا ہے​

 

۔۔۔۔۔۔۔۔یہاں صرف تمھیں کو تمھارا کردیاجائے تو بات روزمرے اور محاورے کے مطابق ہوجاتی ہے۔۔۔۔۔
ہے انکار کیوں اب محبت سے میری
یہ ۔پودا ۔تمھارا۔ لگایا ۔ہوا ۔۔ہے

 

جو میری محبت کے گاتا تھا نغمے۔۔۔۔۔۔۔۔۔۔۔۔۔۔۔۔۔۔۔۔۔میری محبت۔۔۔۔۔۔۔۔۔۔۔م م۔۔۔۔۔۔۔۔تنافریعنی ان آوازوں کے یکجا ہوجانے سے شعر کی روانی میں فرق پڑنا
رہا اب نہ میرا ۔۔پرایا ہوا ہے

÷÷÷​

جو میری محبت کے نغمے تھا گاتا۔۔۔۔۔۔۔۔۔۔۔۔
جو نغمے محبت کے میری تھا گاتا۔۔۔۔۔۔۔۔۔۔۔۔
تھا گاتا جو نغمے محبت کے میری۔۔۔۔۔۔۔۔۔۔۔۔روزمرہ کے برخلاف
۔۔۔۔۔۔۔۔۔۔۔۔تو کیا کیجیے؟ جبکہ مری چاہتوں کے جو گاتا تھا نغمے ۔۔۔۔۔۔۔۔۔۔۔اِس مصرعے میں چاہتوں (یعنی چاہت کی جمع ) کا محل نہیں
وہ چاہت کے میری جو نغمے تھا گاتا
رہا ۔اب۔ نہ۔ میرا ۔پرایا۔ ہوا ہے۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔یا:۔۔عزیز آج میرا پرایا ہوا ہے۔۔۔۔۔۔یا:۔۔عزیز آج وہ ہی پرایا ہوا ہے

 

بہت بہت شکریہ خان بھائی، کیا خوب نئے نئے نقطے بتا کر بلکہ نقطوں سے نقطے نکال کر سوچوں کے در کھلتے ہیں ابھی یہ غزل محفل یعنی محترم الف عین صاحب کے سمنے پیش نہیں کی ، آپ کے مصرعوں کے ساتھ نئی ترتیب دوں گا اور پیش کروں گا ۔ بہت بہت شکریہ اور دعاؤں میں یاد رکھیئے۔

 

اِس میں شکریے کی کیا بات ہے محترم ۔اخذواکتساب کے اِس سفر میں آپ کی اِن کاوشوں
سےخود مجھے اپنا قبلہ دُرست کرنے میں مددملتی ہے۔۔۔۔۔۔۔۔۔۔۔۔۔۔۔۔۔۔۔۔۔
نقطہ۔۔۔۔۔۔۔۔یعنی ڈاٹ ،نشان۔۔۔۔۔قلم کی نوک کاغذسے چھوجانےپرجو نشان بنتا
ہے ۔۔۔۔۔۔۔۔۔۔۔ وہ نقطہ کہلاتا ہے۔۔۔۔۔ب میں ایک نقطہ ہے اور پ میں تین نقطے
ہیں۔۔۔۔۔۔۔۔۔۔۔۔۔۔۔۔
نکتہ۔۔۔۔۔۔۔۔۔۔۔۔۔غور وفکر سے جو ایک بات سے ایک اور بات نکلتی ہے کہ پہلے کی
جانے والی بات کا احاطہ کرتے ہوئے زیادہ گہری ، سچی اور دوٹوک ہو۔۔۔غورو خوص و خوض
کرکے پتے کی بات دریافت کرنا۔۔۔۔۔۔۔۔۔۔باریک ،گہری اور تت کی بات۔۔۔۔۔۔۔
زمین کھرچنے سے جو گڑھاپڑجائے یہ نکتہ ہے ۔۔۔۔۔۔۔۔۔۔۔ذہن پر زور دینے سےسوچ
کا جو نیادرکھل جائے ۔۔۔۔۔۔۔۔۔۔۔۔۔۔۔۔۔۔یہ نکتہ ہے۔۔۔۔۔۔۔۔۔۔۔۔۔۔۔۔۔
1۔نکتہ چیں ،2۔ نکتہ رس، 3۔نکتہ داں، 4۔نکتہ سنج یعنی 1۔نکتہ اٹھانے والا، 2۔نکتے کی بات تک
رسائی پانے والا،3۔گہرے نکات سمجھنے والا اور 4۔جچی تلی بات کہنے والا یعنی شاعرِ خوش بیان۔۔۔
۔۔۔۔۔کسی کو دے کے دل کوئی،۔۔ نوا سنجِ فغاں کیوں ہو؟

نہ ہو جب دل ہی سینے میں تو پھر منہ میں زباں کیوں ہو؟​

مطلب:جب کسی کو دل دیدیا۔۔۔۔۔۔۔۔۔۔اب جو مصائب پیش آئے تو شاعر نے کہا فریاد کا
کوئی موثر اندازنہیں سوجھتا کہ وہ دل کی بات کہےایسے کہ اس کے دل سے نکلے اور سننے والوں کے
دل میں پڑے۔۔۔۔۔حال یہ ہےشاعر نے پھر کہاجیسے سینے میں دل نہیں رہا ایسے ہی منہ میں زباں
بھی نہ رہی ہو۔۔۔۔۔۔۔۔۔گویا وہ عشق کا ماحصل یا مآلِ عشق بتانا چاہتا ہے مگر۔۔۔۔۔۔۔۔۔۔۔
نوا سنجِ فغاں کیوں ہو؟یعنی کون ہے جو اس کی بات سمجھے اور وہ خود اِسے کس طرح بیان کرے۔۔۔؟
شاعر نے ایک اور جگہ خود ہی بات بھی صاف کردی :

فریاد کی کوئی لَے نہیں ہے​

نالہ پابندِ نَے نہیں ہے​

 

ماشاءاللہ

 

مرے تم رقیبوں سے ملتے ہو اب تک۔۔۔۔۔۔۔۔۔یہاں مرے یا میرے لگانا حشوو زوائد قبیل کا عیب ہے
۔۔۔۔رقیب کہہ دیا تو اِس سے مراد میرا ہی رقیب ، مخالف ، دشمن ہوا ۔اگر نثر میں کہیں گے تو کیا یوں نہیں کہتے
مگر پہلے اِس سے متعلق ایک شعر
ہم میں اور تم میں لڑائی ہوگی
یہ ہوائی کسی دشمن نے اڑائی ہوگی
اور یہ جملہ تو آپ نے سنا ہوگا ۔۔۔۔۔۔۔۔دشمنوں نے کام خراب کرکے رکھ دیا۔۔۔۔۔۔۔۔یہاں بھی اور مذکورہ
شعر میں بھی کہیں میرے کی گنجائش ہے۔۔۔۔۔۔؟۔۔۔۔۔۔بالکل نہیں۔۔۔۔۔۔۔۔۔
تو پھر آپ کے شعر کو میرے خیال میں یوں ہونا چاہیے:
۔۔۔۔۔۔۔۔۔رقیبوں سے ملتے ہو جا جا کے اب تک۔۔۔۔۔۔۔۔۔۔۔۔۔۔۔۔یا:۔۔۔رقیبوں سے جاجاکے ملنا یہ اب تک

۔۔وتیرہ کیا تم نے بنایا ہوا ہے۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔وتیرہ سا تم نے بنایا ہوا ہے​

یا۔۔۔۔۔رقیبوں سے جا جا کے ملنا یہ ہر دم۔۔۔۔وتیرہ سا تم نے بنایا ہوا ہے۔۔۔۔۔۔۔۔رقیبوں سے جا جا کے ملنا تمھارا۔۔۔وتیرہ ہی تم نے بنایا ہوا ہے
اسی طرح رقیبوں کے استعمال کی چندمثالیں مزید:
۔۔۔یہ رقیبوں کی ہے سخن سازی۔۔۔۔۔۔۔۔۔۔آپ دیکھیں شاعر نے یہ نہیں کہا:مرے رقیبوں کی ہے سخن سازی

بیوفا آپ ہوں خدا نہ کرے(مردان علی خاں رانا)​

۔۔۔خبر سن کر مرے مرنے کی وہ بولے رقیبوں سے۔۔۔۔۔۔۔یہاں بھی نہیں کہا:خبر مرنے کی سنتے ہی کہامیرے رقیبوں سے

خدا بخشے بہت سی خوبیاں تھیں مرنے والے میں(داغ دہلوی)​

ایسے ہی یہاں بھی:
۔۔۔جب رقیبوں کا ستم یاد آیا۔۔۔۔کچھ تمھارا بھی کرم یاد آیا۔(مصطفی خاں شیفتہ)
۔۔۔رقیبوں کا مجھ سے گلا ہورہا ہے

یہ کیا کررہے ہو یہ کیا ہورہا ہے۔۔۔۔۔۔۔۔۔۔۔حالاں کہ یہاں گنجائش تھی کہہ سکتے تھے۔۔۔۔۔رقیبوں کا میرے گلا ہورہا ہے۔۔مگر ضرورت ہی نہیں ۔۔۔۔۔۔۔۔۔۔

(بیخود دہلوی)​

 

ادا اُس کی ارشدؔ نرالی ہے جس نے
زمانے کو پیچھے لگایا ہوا ہے