فرق رکھتی ہے تیری میری کو

فرق رکھتی ہے تیری میری کو
ہے ادھر شور اور ادھر ہے ہو

عشق و مستی کا ایک بازیچہ
ذکرِ بالجہر جس میں تو ہی تو

تیرے راندہ کیے ہوۓ مجنوں
اب کہیں کر رہے ہیں اللہ ہو

ہے چمک وہ کہ دن میں خیراں چشم
مجھ کو گم رہ کرے گا یہ جگنو

پھول نکہت ادھاری مانگتے ہیں
مجھ پہ ہونے لگا ہے غالب تو

تجھ کو دیکھا بھنور سے نکلا دل
مجھ میں چلنے لگے ہیں اب چپو

میری برباد ہو رہی ہے شام
ہیں تخیل میں چل رہے چاقو

آتشِ عشق میں جلاۓ خواب
رنگ جلنے کی ہر طرف ہے بو

عشق آکاش بیل کی مانند
سخت ظالم ہےاور بڑا بد خو

میں نے آنکھیں بنائیں کاغذ پر
اور پھر خود ہی آگئے آنسو

----------------
ابو لویزا علی

 

بہت خوب ،ماشاء اللہ!

 

واہ ، سبحان اللہ!

 

ایک تجویز:
تیرے واماندہ سب کے سب مجنوں
کررہے ہیں کہیں وہ اللہ ہُو

 

ہے چمک وہ کہ دن میں خیرہ چشم
مجھ کو گم رہ کرے گا یہ جگنو

 

پھول ، نکہت ادھار مانگتے ہیں
مجھ پہ ہونے لگا ہے غالب تُو۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ممحترم ! ادھاری ذرا عام سا لگتا ہے۔

 

تجھ کو دیکھا بھنور سے نکلا دِل
مجھ میں پتوار کی ہے اب خُو بُو

 

تخیل میں کی بجائے تخیل پہ ۔۔۔۔۔۔۔۔۔۔غور فرمائیے گا؟۔۔۔۔۔۔۔۔ہیں تخیل پہ چل رہے چاقو

 

محترم!
آتشِ عشق نے وہ پھونکے خواب۔۔۔۔۔۔۔۔۔۔۔۔۔۔۔۔۔۔۔۔۔(اِس تجویز پر بھی غورفرمائیے گا)۔۔رنگ جلنے کی ہر طرف ہے بُو

 

بے شک !
ماشاء اللہ!

 

لاجواب ، بے مثال ۔۔۔۔۔۔۔کمال کردیا جناب ،ماشاء اللہ !

۔۔۔۔۔۔نہیں جاتی کہاں تک فکرِ انسانی نہیں جاتی۔۔۔۔۔۔
ایک بار پھر ڈھیرساری داد۔۔۔۔

 

بہت شکریہ شکیل بھائی شاد و سلامت رہیں