بے خرد روحوں کے شکوے اور گلے پیش نظر

بے خرد روحوں کے شکوے اور گلے پیش نظر
سوچ کی جاگیر رکھ دی آپ کے پیش نظر

اک نئی منزل کی جانب عشق میں ہے کوہکن
مسئلوں کے ہیں پہاڑی سلسلے پیش نظر

رات نے دیکھا نہیں ابتک چمکتے دن کا روپ
ہجر میں رکھے ہیں ایسے مسئلے پیش نظر

دل مدینے رہ گیا آنکھیں وہیں پر رہ گئیں
آج بھی ہیں اس گلی کے راستے پیش نظر

اک مقدس عشق کی تردید کے اجماع پر
ہو رہے ہیں سارے یکجا فلسفے پیش نظر

خوش بدن کی آنکھیں مجھ کو کھینچتی ہیں اپنی اور
اس محل کے آج بھی ہیں طاقچے پیش نظر

 

بے خِرد روحوں کےشکوے،سوچ کی جاگیر،مسئلوں کے پہاڑی سلسلے،محل کے طاقچے۔۔۔۔۔
۔۔۔۔۔۔۔۔۔خوش بدن کی آنکھیں مجھ کو کھینچتی ہیں اپنی اُور۔۔۔۔۔۔۔واہ واہ واہ ، خوبصورت
فکشن ۔۔۔۔خوبصورت ڈِکشن۔۔۔۔۔۔۔۔۔۔۔۔۔ماشاء اللہ جناب ، بہت دِنوں کے بعد آئے
مگر کیا خوبصورت تحفہ ساتھ لائے ۔۔۔۔۔۔۔۔۔۔فکر انگیز بھی اور خیال آفریں بھی ۔۔۔۔۔۔

 

بہت شکریہ شکیل بھائی شاد و سلامت رہیں

غیر حاضری کی وجہ لاک ڈاون اور پھر جب آفس کھلا تو کرونا ہو گیا تاہم اب تندرست ہوں اور آپ لوگوں کی دعاؤں کا طلب گار ہوں

 

خدا آپ اور تمام احباب کودنیا و آخرت کی ہر تکلیف سے محفوظ رکھے، آمین ثم آمین!

 

خوبصورت کلام
کورونا کا سن کر دکھ ہوا اور صحت یابی پر انتہائی خوشی
اللہ رب کریم ہر آفت و مصیبت سے محفوظ رکھے آمین

 

بہت شکریہ بھائی شاد و سلامت رہیں