شکوہ - جواب شکوہ

شکوہ
===========
تم مرا اضطراب، کیا جانو
کتنے ٹوٹے ہیں خواب، کیا جانو

جو بھی چاہا تھا ، پا لیا تم نے
تم ہمارے سراب ، کیا جانو

تم کو لازم تھا پوچھتے تو سہی
تم ہمارا جواب ، کیا جانو

تم جو دریا کے پاس بیٹھے ہو
تشنگی کا عذاب ، کیا جانو

دکھ غریبی کے کیسے ہوتے ہیں
تم ہو عالی جناب ، کیا جانو

بے خبر ہو ،سو خوش ہو، کیونکہ تم
آگہی کا عذاب، کیا جانو

میں تمھارے ہی نام ہوں سعدی
تم مگر انتساب، کیا جانو

جواب شکوہ
===========
میں ترا اضطراب جانتی ہوں
کیا تھے تیرے وہ خواب جانتی ہوں

میں بھی ہر کیفیت سے گذری ہوں
دکھ، غریبی ، سراب جانتی ہوں

جانتی ہوں بتا نہیں سکتی
آگہی کا عذاب جانتی ہوں

آپ کو بس مجھی سے نسبت ہے
جانتی ہوں جناب جانتی ہوں

کیا کروں گی میں پوچھ کر سعدی
میں تمھارا جواب جانتی ہوں

سعید سعدی

 

دونوں اصناف کے جذبات ،ماشاءاللہ بہت خوب لیکن ایک مصرعے میں گڑ بڑ ہے ( میں بھی ہر کیفیّت سے گزری ہوں ) لفظ کیفیّت (مفعولن ) کے وزن پر ہے ،اس لئے وزن پورا نہیں
ایک مشورہ (میں بھی ہوں کیفیات سے گزری)

 

پسندیدگی کا شکریہ
کیفیت کو شعراء نے مفعولن اور فاعلن دونوں اوزان پر باندھا ہے..
درست وزن مفعولن ہی ہے...لیکن فاعلن بھی چلتا ہے....

بہرحال کوشش ہوگی کہ اس کو تبدیل کر لیا جائے..

جزاک اللہ

 

شکریہ آپ نے ایکنقطہ بتا دیا ۔کیفیات شائد مفاعلن کے وزن پر ہے

 

واہ.................... بہت خوب محترم

خوبصورت شراکت کے لیے شکریہ