درد سے چُور ہوتے جا رہے ہیں

درد سے چُور ہوتے جا رہے ہیں
زخم ناسُور ہوتے جا رہے ہیں

بدگُمانی کاکچھ سبب ہی نہیں
بے سبب دُور ہوتے جارہے ہیں

اشک مشکیزے ، غم کے کاندھوں پر
غم بھی مزدُور ہوتے جا رہے ہیں

انکسارُالمزاج ہم ہُوئے کیا
لوگ مغرُور ہوتے جا رہے ہیں

میری غزلوں کو اوڑھ کر مرے غم
کتنے مشہُور ہوتے جا رہے ہیں

دن کی آنکھوں سے جو بہے جگنو
شب کا وہ نُور ہوتے جا رہے ہیں

کھودے قبر اپنی ہر کوئی ، عاشیؔ
کیسے دستُور ہوتے جا رہے ہیں
~~~~~~~~~~
عائشہ بیگ عاشیؔ​

 

خوب

 

بہت خوب عائشہ بیگ عاشی جی ۔ بہت سی داد قبول ہو

 

بہت خوبصورت