اے حسن حقیقی نور ازل

اے حسن حقیقی نور ازل
تینوں واجب تے امکان کہوں

تینوں خالق ذات قدیم کہوں
تینوں حادث خلق جہان کہوں

تینوں مطلق محض وجود کہوں
تینوں علمیہ اعیان کہوں

ارواح نفوس عقول مثال
اشباح عیان نہان کہوں

تینوں عین حقیقت ماہیت
تینوں عرض صفت تے شان کہوں

انواع کہوں اوضاع کہوں
اطوار کہوں اوزان کہوں

تینوں عرش کہوں افلاک کہوں
تینوں ناز نعیم جنان کہوں

تینوں تت جماد نبات کہوں
حیوان کہوں انسان کہوں

تینوں مسجد مندر دیر کہوں
تینوں پوتھی تے قرآن کہوں

تسبیح کہوں زنار کہوں
تینوں کفر کہوں ایمان کہوں

تینوں بادل برکھا گاج کہوں
تینوں بجلی تے باران کہوں

تینوں آب کہوں تے خاک کہوں
تینوں باد کہوں نیران کہوں

تینوں وسرت لچھمن رام کہوں
تینوں سیتا جی جانان کہوں

بلدیو جسودا نند کہوں
تینوں کشن کنیہا کان کہوں

تینوں برما بشن گنیش کہوں
مہا دیو کہوں بھگوان کہوں

تینوں گیت گرنت تے بید کہوں
تینوں گیان کہوں اگیان کہوں

تینوں آدم حوا شیث کہوں
تینوں نوح کہوں طوفان کہوں

تینوں ابراہیم خلیل کہوں
تینوں موسی بن عمران کہوں

تینوں ہر دل دا دلدار کہوں
تینوں احمدؐ عالی شان کہوں

تینوں شاہد ملک حجاز کہوں
تینوں باعث کون مکان کہوں

تینوں ناز کہوں انداز کہوں
تینوں حور پری غلمان کہوں

تینوں نوک کہوں تینوں ٹوک کہوں
تینوں سرخی کجلہ پان کہوں

تینوں طبلہ تے تنبور کہوں
تینوں ڈھولک سر تے تان کہوں

تینوں حسن تے ہار سنگار کہوں
تینوں عشوہ غمزہ آن کہوں

تینون عشق کہوں تینوں علم کہوں
تینوں وہم یقین گمان کہوں

تینون حسن قوی ادراک کہوں
تینوں ذوق کہوں وجدان کہوں

تینوں سکر کہوں سکران کہوں
تینوں حیرت تے حیران کہوں

تسلیم کہوں تلوین کہوں
تمکین کہوں عرفان کہوں

تینون سنبل سوسن سرو کہوں
تینوں نرگس نافرمان کہوں

تینوں لالہ داغ تے باغ کہوں
گلزار کہون بستان کہوں

تینوں خنجر تیر تفنگ کہوں
تینوں برچھا بانک سنان کہوں

تینوں تیر خدنگ کمان کہوں
سوفار کہوں پیکان کہوں

بے رنگ کہوں بے مشل کہوں
بے صورت ہر ہر آن کہوں

سبوح کہوں قدوس کہوں
رحمان کہون سبحان کہوں

کر توبہ ترت فرید سدا
ہر شے نوں پر نقصان کہوں

اسے پاک الکھ بے عیب کہوں
اسے حق بے نام نشان کہوں
​

 

ہر مصرعہ بلکہ ہر ایک حرف دل موہ لینے والا ہے

 

جزاک اللہ جناب