اُٹھا کے راکھ سے ذرّہ، ستارہ کر کے دیکھیں گے ٭٭٭٭عائشہ بیگ عاشی

اُٹھا کے راکھ سے ذرّہ، ستارہ کر کے دیکھیں گے
فلک، دریائے حیرت کا کنارہ کر کے دیکھیں گے

کسی دن، آگ کے شعلے سے بادل بھی بنائیں گے
کسی دن، برف گالے کو شرارہ کر کے دیکھیں گے

کوئی پل، خواب جگنو روک لیں گے اپنی مٹھی میں
کوئی پل، روشنی کو استعارہ کر کے دیکھیں گے

کبھی، خاموش لمحوں میں کریں گے گفتگو جذبے
کبھی، گویا رُتوں میں حرف اشارہ کر کے دیکھیں گے

تمہارے نام ، کچھ پل کر کے صدیوں کا سکوں پایا
تمہارے نام، جیون اب تو سارا کر کے دیکھیں گے

سنو! ہم کر چکے بیعت، جنوں کو کر چکے مرشد
سنو! کس نے کہا ہم، استخارہ کر کے دیکھیں گے

ترے احساس، میں ضم ہو گیا احساس عاشی کا
ترے احساس کو خوشبو کا دھارا کر کے دیکھیں گے
~~~~~~~
عائشہ بیگ عاشی​

 

بہت ہی پیاری غزل ہے بہت سی داد قبول فرمائیں ۔۔۔اللہ آپ کو سلامت رکھے خوش رکھے آمین

 

عمدہ غزل عاشی جی۔ بہت اعلی

 

بہت خوبصورت

 

بہت خوبصورت غزل ہے