اپنی انا گئی نہ ہی دردِ جگر گیا

عزیزی آصف رضا کا چھوٹا بھائی پچھلے دنوں ڈکیتی کی واردات میں مارا گیا جتنا دکھ مجھے ہوا ہے آپ نہیں سمجھ سکتے.

اپنی انا گئی نہ ہی دردِ جگر گیا
ہم جس کو مارتے رہے وہ دل ہی مر گیا

جس میں نگاہ گم تھی وہ منظر نہیں رہا
ذوقِ نظر گیا مرا، دل بـے ثمر گیا

تھا جن پہ اختیار وہ سانسیں اٹک گئیں
تھا جس پہ اعتبار وہ دل سا کدھر گیا

شعلہ جواں کی موت پر آتش جواں کا سوگ
پھر یوں پھٹا کلیجہ کہ منہ خوں سے بھر گیا

آئی بہار چاندنی آئی گزر گئی
دل کیا مناۓ خوشیاں جو خود سے مکر گیا

اس کے وصالِ حق کی خبر تھی کہ بار تھی
ماتھے پہ بل پڑے مرا چہرہ اتر گیا

 

محترم !
آپ کے عزیزدوست کے برادرِ خوردکی ظالم ڈاکوؤں کے ہاتھوں شہادت کی خبر بجائے خود ایک دلفگارمرثیہ اورجگرخراش نوحہ ہے ،جس کے غم ناک اشعار کے اثرسے پیج بھی افسردہ وملول محسوس ہوتا ہے :

جس میں نگاہ گم تھی وہ منظر نہیں رہا
ذوقِ نظر گیا مرا، دل بے ثمر گیا
شعلہ جواں کی موت پر آتش جواں کا سوگ
پھر یوں پھٹا کلیجہ کہ منہ خوں سے بھر گیا
​

خدا اُس عزیز کو صبرِِ جمیل، شہیدکو مقاماتِ عالیہ اور آپ کےمضطرب قلب کو سکون عطافرمائے،آمین!