شاعر کا خط

شاعر کا خط
میرے خوابوں کی ملکہ! مطلع عرض ہے کہ میں ٹھیک ٹھاک ہوں، ہر فنی نقص سے پاک ہوں اور آلودئہ خاک ہوں۔ کئی دنوں سے تمہیں مسلسل یاد کر رہا ہوں۔ اپنے آپ کو برباد کر رہا ہوں، کچھ پہلے اور کچھ بعد کر رہا ہوں۔ تم نے وعدہ کیا تھا کہ جلد ملاقات کے لئے آؤں گی اور تمہارے دل کی پیاس بجھاؤں گی اور کافی دیر کے بعد واپس جاؤں گی، ذرا مکرر ارشاد فرماؤ کہ کب قدم رنجہ فرماؤ گی۔ بعض اوقات تو مجھ پر سکتہ طاری ہو جاتا ہے کیونکہ تم میری ردیف کی طرح ہو جو ہر سانس کے آخر پر آتی ہے۔ اُمید ہے کہ تمہارا وزن پورا ہوگا اور بحر بھی مناسب ہوگی اور روانی بھی ٹھیک ٹھاک۔ براہِ کرم اپنا قافیہ تنگ نہ ہونے دیا کرو اور اگر خود نہیں آ سکتیں تو مجھے فرمائش کرو، میں کچے دھاگے سے بندھا چلا آؤں گا کیونکہ مشاعروں کا موسم نہیں ہے اور میں بالکل فارغ ہوتا ہوں۔(فقط تمہارا اور صرف تمہارا جابرؔ جبل پوری)​