حمد لکھ لے قلم خدا کے لئے ۔ بلال رشید

حمد لکھ لے قلم خدا کے لئے
یہ ہی سامان ہے بقا کے لیے
اس نے بخشا طلب سے بھی زیادہ
ہاتھ جب بھی اٹھے دعا کے لیے
جسم سارا ہی وجد کرتا ہے
جب بھی کھلتے ہیں لب ثنا کے لئے
کاش گزرے یہ زندگی ساری
خالق کل تری رضا کے لیے
کر روانی مرے سخن کو عطا
اے خدا حمداور ثنا کے لیے
ساری مخلوق ہے فنا لیکن
آپ باقی ہے وہ سدا کے لیے
ہم ہیں غافل دعا جو کرتے نہیں
وہ تو تیار ہے عطا کے لیے
حکم اس کا جہاں نہ چلتا ہو
ڈھونڈیئے وہ جگہ خطا کے لیے
علم عرفان معرفت تسکیں
لاکھ ہیں نعمتیں گدا کے لیے
ہر طرح کا غرور و کبر بلال
زیب دیتا ہے کبریا کے لئے
---
بلال رشید
​

 

اللہ تعالیٰ آپ کو بھی جزائے خیر عطا کرے آمین

 

سبحان اللہ- جزاک اللہ

 

اللہ تعالیٰ آپ کو بھی جزائے خیر عطا کرے آمین