در پیش کب سے تھا جو سفر ہی نہیں رہا

در پیش کب سے تھا جو سفر ہی نہیں رہا
چلنا تھا جس پہ راہگزر ہی نہیں رہا
یہ دل دھڑک رہا ہے، تری یاد کے بغیر
اس کا جو اصل کام ہے کر ہی نہیں رہا
کیا جانے راتوں رات کہاں کوچ کر گئے
جس پر صدا لگائی وہ در ہی نہیں رہا
جو کشتیوں کو اپنی طرف خود ہی کھینچ لے
وہ اپنے پانیوں میں بھنور ہی نہیں رہا
جس طرح ہمارے کام سے برکت ہی اُٹھ گئی
اگلا سا بات میں وہ اثر ہی نہیں رہا
تکمیل کی اُمید اُسی سے لگائی ہے
جو کام اپنے پیشِ نظر ہی نہیں رہا
یہ زندگی دکان تھی ایسی جہاں ہمیں
کچھ امتیازِ نفع و ضرر ہی نہیں رہا
یہ شاعری بھی جیسے کسی اور ہی کی ہے
تھوڑا بہت جو تھا وہ ہنر ہی نہیں رہا
میری زمین پہ پائوں وہ دھرتا تو کیا ظفرؔ
جو اپنے آسماں سے اُتر ہی نہیں رہا​