جن کے ہونٹوں پہ ہنسی پائوں میں چھالے ہوں گے

جن کے ہونٹوں پہ ہنسی پائوں میں چھالے ہوں گے
ہاں وہی لوگ تمہیں چاہنے والے ہوں گے
مے برستی ہے فضائوں پہ نشہ طاری ہے
میرے ساقی نے کہیں جام اُچھالے ہوں گے
شمع وہ لائے ہیں ہم جلوہ گہہ جاناں سے
اب دو عالم میں اُجالے ہی اُجالے ہوں گے
ان سے مفہوم غم زیست ادا ہو شاید
اشک جو دامن مژگاں نے سنبھالے ہوں گے
ہم بڑے ناز سے آئے تھے تری محفل میں
کیا خبر تھی لبِ اظہار پہ تالے ہوں گے

پرواز جالندھری​