ایک تازہ غزل : اک پل میں وہ ماشہ پل میں تولہ تھا

اک پل میں وہ ماشہ پل میں تولہ تھا
یہ جو زخم ہے پہلے ایک پھپھولا تھا

اس محفل میں ہم کتنے محتاط رہے
پہلے سوچا ،پھر تولا، پھر بولا تھا

یہ عالم تھا اس کی ظاہر داری کا
ساتھ بٹھایا جس کا اُجلا چولا تھا

میری ذات پہ تہمت رکھنے سے پہلے
کس نے خود کو پرکھا اور ٹٹولا تھا

ہم نے اس کے دستک دینے سے پہلے
اپنے دل کا ہر دروازہ کھولا تھا

آخر جنگ میں ایک سپاہی کیا کرتا
اس کے سنگ تو غداروں کا ٹولہ تھا

بد عنوانی سے اس کو بھی شکوہ ہے
جس نے ہلکے باٹ سے سودا تولا تھا

خوش وہ تھا ،جو تھا ہر شے سے بیگانہ
ہاتھ میں کاسہ ،نے کاندھے پر جھولا تھا


سعید سعدی

 

واہ کیا خوب کہا ہے

میری ذات پہ تہمت رکھنے سے پہلے
کس نے خود کو پرکھا اور ٹٹولا تھا

 

پسندیدگی کے لئے شکرگزار ہوں ۔۔۔ لیکن کیا بات ہے شاعری کا یہ سیکشن آج کل اس فورم کے ممبران کی توجہ سے محروم لگ رہا ہے

 

میری تو ذاتی مصروفیات تھیں
باقی کا پتہ نہیں

 

آخر جنگ میں ایک سپاہی کیا کرتا
اس کے سنگ تو غداروں کا ٹولہ تھا
بہت عمدہ